Tha Coimisean Fearainn na h-Alba a’ toirt cuireadh do dhaoine air feadh na h-Alba na beachdan aca a cho-roinn air dreachd a’ Phlana Gàidhlig aca, a’ mìneachadh mar a neartaicheas a’ bhuidheann cleachdadh is adhartachadh na Gàidhlig thar nan còig bliadhna a tha romhainn.
Tha an co-chomhairle phoblach, a’ ruith airson sia seachdainean, a’ toirt cothrom do dhaoine fa leth, buidhnean coimhearsnachd agus luchd-ùidh cuideachadh le bhith a’ toirt fiosrachadh don phlana dheireannach mus tèid gabhail ris.
Tha a’ Ghàidhlig air a fighe a-steach do chruthan-tìre, coimhearsnachdan agus eachdraidh na h-Alba o chionn fhada. Tha ainmean-àite, sgeulachdan agus traidiseanan a’ nochdadh an dàimh dlùth eadar fearann, cànan agus daoine, agus tha an ceangal sin fhathast a’ cumadh mòran choimhearsnachdan an-diugh.
Tha dreachd a’ Phlana Gàidhlig aig Coimisean Fearainn na h-Alba a’ mìneachadh mar a mheudaicheas a’ bhuidheann faicsinneachd agus cleachdadh na Gàidhlig thar a cuid obrach, mar a leasaicheas iad cothroman conaltradh leis a’ Choimisean sa Ghàidhlig far a bheil sin iomchaidh, agus mar a chuireas iad ri amasan nas fharsainge Plana Nàiseanta na Gàidhlig.
Tha dreachd a’ phlana cuideachd a’ nochdadh dealas a’ Choimisein gus dèanamh cinnteach gum bi a’ Ghàidhlig air aithneachadh mar chànan beò le pàirt chudromach ann an Alba an-diugh agus san àm ri teachd.
Thuirt Mìcheal Ruiseal, Cathraiche Coimisean Fearainn na h-Alba:
"Tha fearann agus cànan an-còmhnaidh air a bhith ceangailte gu dlùth ri chèile ann an Alba. Bidh a’ Ghàidhlig gar cuideachadh le bhith a’ tuigsinn ar cruthan-tìre, ar n-eachdraidh agus na coimhearsnachdan a tha air a bhith gan glèidheadh thar ginealaichean.
“Mar bhuidheann ath-leasachaidh fearainn na h-Alba, tha sinn airson gum bi an ceangal sin a’ nochdadh san obair againn agus gun cluich sinn ar pàirt ann a bhith a’ toirt taic don Gàidhlig mar chànan beò. Tha dreachd a’ phlana seo a’ mìneachadh gnìomhan practaigeach a chuidicheas sinn gus sin a dhèanamh.
"Co-dhiù a bheil sibh a’ bruidhinn Gàidhlig a h-uile latha, ag ionnsachadh a’ chànain no dìreach a’ gabhail cùram mu a h-àm ri teachd, tha sinn airson ur beachdan a chluinntinn." Cuidichidh ur beachdan le bhith a’ dèanamh cinnteach gu bheil am plana deireannach againn brìoghmhor agus so-dheànta."
Tha a’ cho-chomhairle fosgailte airson sia seachdainean agus tha fàilte air freagairtean bho luchd-labhairt na Gàidhlig, luchd-ionnsachaidh, buidhnean agus duine sam bith aig a bheil ùidh ann an àm ri teachd na cànain.
Tha dreachd a’ Phlana Gàidhlig agus a’ cho-chomhairleachadh rim faighinn air làrach-lìn Coimisean Fearainn na h-Alba, agus tha lethbhric phàipeir rim faighinn air iarrtas.
- Tha co-chomhairle a’ dùnadh: Diluain 26 An Dàmhair
- Leugh dreach den phlana: Plana Gàidhlig
- Faighibh barrachd fios agus freagraibh: Scottish Land Commission Gaelic Language Plan feedback
